Channel 9 නාලිකාවේ සුප්‍රකට ක්‍රිකට් තේමා සංගීත වාදනය

සිනමා පටයක,රූපවාහිනී ටෙලි නාට්‍ය මාලාවක රූපවාහිනී වැඩසටහන් පෙළක තේමා සංගීතයට කල හැකි බලපෑම ඉමහත්ය.අදටත් ඇතැම් නිර්මාණයන් පිළිබඳ කතා කිරීමේදී එම නිර්මාණයේ තේමා සංගීතය ප්‍රේක්ෂක සිත් සතන් තුල තදින් කා වැදී තිබීම එම නිර්මාණයට චිරාත් කාලයක් ප්‍රේක්ෂකයන් ඇළුම් කිරීමට උත්ප්‍රේරක කාර්යය අනියමින් සපයා ඇති බවට පෙන්වීමට ඕනෑ තරම් උදාහරණ ගෙන හැර දැක්විය හැක.මෙම ලිපියෙන්  කතාකිරීමට බලාපොරොත්තු වන්නේ ක්‍රිකට් ක්‍රීඩාව හා සබැඳි අමතක නොවන එක්තරා සුවිශේෂී තේමා සංගීත වාදනයක් පිළිබඳවයි.

Channel 9 නාළිකාවේ නිල ලාංඡනය

ඕස්ට්‍රේලියාවේ "Nine Network" , නැතහොත් පොදුවේ කවුරුත් දන්නා පරිදි "Channel 9" නාලිකාව ඔස්සේ 1977 වසරේදී සජීවී විස්තර ප්‍රචාරණ සිදුකෙරුනු World Series Cricket (WSC) නම් වූ සුවිශේෂී ටෙස්ට් ක්‍රිකට් තරගාවලිය සඳහා Brian Bennett නම් එංගලන්ත ජාතික සගීතඥයා විසින්  1974 වසරේදී නිර්මාණය කර තිබූ New Horizon නම් සංගීත වාදනයේ කොටසක් තේමා සංගීත ඛණ්ඩය ලෙස ප්‍රථම වරට 1977 වසරේ නොවැම්බර් 24 වන දින World Series Cricket ටෙස්ට් තරගාවලිය ආරම්භයේදී ප්‍රථම වරට  විකාශනය කිරීම සිදුවිය.

Brian Bennett

WSC ටෙස්ට් තරගාවලිය 1979 වසරෙන් පසු නතරවූවත් එම තේමා සංගීත ඛණ්ඩය ඕස්ට්‍රේලියානු ක්‍රිකට් ඉතිහාසයට කල බලපෑම ඉන් නතර නොවුනි. ඉන්පසු ඕස්ට්‍රේලියාව සහ වෙනත් රටක් ඕස්ට්‍රේලියාවේදී ටෙස්ට් තරග ක්‍රීඩා කරන අවස්ථාවන්හිදී එය Channel 9 නාලිකාවව ඔස්සේ විකාශනය කරන්නේ නම් තරගයට පෙරතුව නාලිකාව ඔස්සේ එය ආරම්භක තේමා සංගීත ඛණ්ඩය ලෙස ප්‍රචාරණය කිරීම සිදුවූ අතර ක්‍රමයෙන් මෙය ඕස්ට්‍රේලියානු ජනතාව මෙන්ම ලොව පුරා වෙසෙන ක්‍රිකට් ක්‍රීඩා ලෝලී ජනතාව අතර සුවිශේෂී අනන්‍යතාවයක් සහිත නිර්මාණයක් ලෙස ආකර්ෂණයට ලක්විය. අදටත් Channel 9 නාලිකාවව එම සම්ප්‍රදාය රැකගෙන එමින් ඔවුන්ගේ නාළිකාව හරහා සජීවී විස්තර ප්‍රචාරය සිදුකරන අන්තර්ජාතික ක්‍රිකට් තරග වලට පෙරතුව මෙය තේමා සංගීතය ලෙස භාවිත කරයි.

පහත දැක්වෙන්නේ මෙම තේමා ගීතය භාවිතා වූ විවිධ අවස්ථාවන්ට අදාළව අන්තර්ජාලයෙන් උපුටා ගත් නිදසුන් කිහිපයකි.

WSC තරගාවලියක තේමා සංගීතය භාවිත වූ අයුරු
ඉන්දියාව සමඟ පැවති ටෙස්ට් තරගාවලියක තේමා සංගීතය භාවිත වූ අයුරු
ඕස්ට්‍රේලියාවේ පැවති අළු බඳුන තරගාවලියක තේමා ගීතය භාවිත වූ අයුරු

කුරුළු ලොවේ මයිකල් ජැක්සන්

මධ්‍යම සහ දකුණු අමෙරිකාවේ ඇතැම් රටවල Red Capped Manakin නම් වූ එක්තරා අපූරු කුරුළු වර්ගයක් වාසය කරයි.රතු පැහැති හිසක් කළුවන් ශරීරයක් සහ පාදය වටා කහ පැහැති පිහාටු වලින් හැඩවුනු මෙම වර්ගයේ පිරිමි පක්ෂියා සහ කොළ පැහැති ශරීරයක් සහිත ගැහැණු පක්ෂියා තුරු අතු පතර සිදුකරන ක්ෂණික වේගවත් එහා මෙහා පියඹා යෑම් සුවිශේෂී වේ. බහුල වශයෙන් පළතුරු ආහාරයට ගැනීමට රුචිතාවයක් දක්වන මෙම පක්ෂියා කෘමී සතුන් පියාඹා ඩැහැ ගැනීම දක්නට ලැබේ.

Red Capped Manakin පක්ෂීන් යුවලක්

වර්ගයා බෝ කිරීමේලා ඇතැම් පක්ෂීන් සහකාරිය ආකර්ෂණය කරගැනීමට මියුරු හඬින් නාදකරයි.ඇතැම් පක්ෂීන් අලංකාර කූඩු තනා සහකාරියගේ කැමැත්ත පතයි.තවත් පක්ෂීන් තම ශරීරයේ අලංකාර වර්ණවත්භාවය සහකාරියට පෙනෙන්නට සලස්වයි.ඒ එක් එක් ආකාර අතර  මෙම Red Capped Manakin පක්ෂීන්ගේ අභිජනන සමයේ පිරිමි සත්ත්වයා එම වර්ගයේ ගැහැණු පක්ෂීන් ආකර්ෂණය කර ගැනීමට අපූරු නර්තන ආකාරයක් සිදුකරයි.

මේ සියළු ක්‍රියාදමයන්ට පෙරතුව පිරිමි කුරුල්ලා විසින් ගැහැණු කුරුල්ලාට තම ක්‍රියාකාරකම් හොඳින් දිස්වීමට කොළ අඩු පැහැදිලි අත්තක් තෝරා ගනී.ලැග සිටින අත්තෙන් ක්ෂණිකව නික්ම එහා මෙහා වට කිහිපයක් පියඹා නැවත අත්තෙහි ලැග ඉදිරියට නැමී පෙඳය ඔසවා මඳක් වනමින් සිය පියාපත් යුගල පියඹා යෑමට උත්සාහ කරන අයුරින් තටු ගැසීම සිදුකරයි.ඉන්පසු ලැග සිටින අත්තේ එහා මෙහා වේගයෙන් පසුපසට ලිස්සා යන අයුරින් සිදුකරන අපූරු චමත්කාර ජනක නර්තනය බලා සිටින අයට සිහිකර දෙන්නේ සුප්‍රකට පොප් ගායන ශිල්පී මයිකල් ජැක්සන් සිදුකල  මූන් වෝක් (Moon Walk) නර්තන වින්‍යාසයයි.නමුත් සැබවින්ම සිදුවන්නේ පිරිමි පක්ෂියා විසින් වේගයෙන් පිටුපසට සිදුකරන කුඩා පැනීම් සමූහය පිටුපසට වේගයෙන් ලිස්සා යාමක් ලෙස මිනිස් ඇසට නිරීක්ෂණය වීමයි.මෙම සතුන් පියඹා යාමේදී තියුණු ශබ්දයක් නිකුත් වන අතර එම ශබ්දය උන්ගේ මුවින් පිටවන්නක් නොව පියපත් කෙලවර ගැටීමෙන් ඇතිකරවන්නක් බව විද්‍යාඥයින් තහවුරු කොට ගෙන ඇත.

පහත උපුටාගත් වීඩියෝ කොටසින් දැක්වෙන්නේ Red  Capped Manakin පිරිමි පක්ෂියා එම නර්තනයේ යෙදෙන ආකාරයයි.

ගිනි වළල්ල

ගිනි වළල්ල

පෘථිවිය පුරා විසිරී ඇති ගිනිකඳු ප්‍රමාණයෙන් 75% පමණ පිහිටා ඇති සැතපුම් 25000 ක දිගින් යුතු එක්තරා අපූරු භූගෝලීය පිහිටීමක් ඇත.එය පැසිෆික් සාගරයේ වෙරළ තීරයක් මූලික කොට ගෙන පිහිටා ඇති කවාකාර භූමි පෙදෙසක් වන අතර නමින් ගිනි වළල්ල (Ring Of Fire ) ලෙස ලොව ප්‍රචලිතව පවතී.ලොව පුරා සිදුවන භූමි කම්පා වලින් 90%ක් පමණ සිදුවන්නේ මෙම භූමි කලාපය ආශ්‍රිතවය.මෙය ගිනි වළල්ල ලෙසින් හැඳින්වෙන්නේ එම කලාපය පුරා පැතිරී ඇති සක්‍රීය ගිනිකඳු එකට ගත් කල කවයක් ලෙසින් දකුණු ඇමෙරිකාවේ බටහිර වෙරළ වල සිට  නවසීලන්තය දක්වා උතුරු අර්ධ ගෝලය හරහා සළකුණු වන හෙයිනි.

කේතු හැඩැති Stratovolcano ලෙසින් හැඳින්වෙන ගිනිකඳු

මෙම ගිනි වළල්ලේ පිහිටි ගිනිකඳු විදාරනය වීමේදී දැඩි ප්‍රචණ්ඩතාවයක් පෙන්නුම් කරයි.මෙම ගිනිකඳු ඉතා හොඳ කේතු හැඩයක් ගැනීමද විශේෂ ලක්ෂණයකි. ගිනි වළල්ලේ පිහිටා ඇති ගිනිකඳු විදාරණය වීමේදී පිටවන්නේ සිලිකා බහුල මැග්මා වේ.සිලිකා බහුලවීම  නිසා එම මැග්මා වල ඉහළ දුස්ස්‍රාවීතාවයක් පවතී.පොදුවේ ගිනිකන්දක විදාරණයේදී මැග්මා සමඟ වායූන් ගිනිකඳු විවරයෙන් නිකුත්වේ. නමුත් සිලිකා බහුල වීම නිසා දුස්ස්‍රාවීතාවය අධික වූ Blocky lava ලෙසින් හැඳින්වෙන මෙම ලාවා වර්ගය හේතුවෙන් එම වායූන්ට රිසිසේ  විවරයෙන් පිටතට ගමන් කිරීමට නොහැකි වීම නිසා ගිනිකන්ද තුල විශාල පීඩනයක් එක්රැස් වී එය දරාගැනීමේ උපරිම සීමාවට ළඟා වූ විට ප්‍රචණ්ඩ විදාරණයක් සිදුකරයි.විදාරණයෙන් අනතුරුවද මෙම ලාවා වල ඇති අඩු සචලතාවය නිසා ගිනිකන්ද දෙපසින් සෙමින් පහල බැසීම හේතු කොට ගෙන එක මත එක ස්ථර වශයෙන් තැන්පත් වී ඝනීභවනය වී උස් බිම් සැකසේ.එය ඉහත සඳහන් කල කේතු හැඩැයෙන් යුත්  Stratovolcano ලෙසින් හැඳින්වෙන ගිනිකඳු වර්ගය බහුල වශයෙන් පැසිෆික් ගිනි වළල්ලේ පිහිටා තිබීමට හේතු වී ඇත.

Phytoplankton ක්ෂුද්‍ර ජීවීන්

පැසිෆික් ගිනි වළල්ලේ ගිනිකඳු විදාරණයේදී පිටතට පැමිණ ඝණීභූත වූ පාෂාණ කොටස් අධ්‍යයනය කල විද්‍යාඥයින් පහදා දෙන  ආකාරයට ඒවායේ Hornblende ලෙසින් හැඳින්වෙන ස්ඵටික නිරීක්ෂණය වී ඇත.මෙම  Hornblende ස්ඵටික නිර්මාණය වන්නේ ජලය තිබෙන පරිසරයක් තුල වීමද විශේෂත්වයකි.තවද ගිනි වළල්ලේ ගිනිකඳු වලින් පිටවන වායූන් අධ්‍යයනය කල විද්‍යඥයින් පවසන්නේ C-12 මූලද්‍රව්‍ය සැලකිය යුතු මට්ටමින් ඔවුන්ට නිරීක්ෂණය කල හැකි වූ බවයි.ජලය තිබෙන පරිසරයක් තිබීම සහ C-12 මුලද්‍රව්‍ය තිබීම ගිනි වළල්ලේ ගිනිකඳු තුල ක්‍රියාවලියට සහභාගි වන්නේ කෙසේද යන ගැටළුව විද්‍යාඥයන් පහදා දෙන ආකාරය ඉතා සිත්ගන්නා සුළු වේ.එය මෙසේය.සාගරයේ වෙසෙන Phytoplankton නම් ක්ෂුද්‍ර ජීවී කාණ්ඩය වර්ධනයේදී තම සෛල තුලට C-12 උරාගැනීම සිදුකරයි.එම ක්ෂුද්‍ර ජීවීන් අභාවයට පත්වූ විට උන්ගේ ශරීර ක්‍රමයෙන් සාගර පත්ලට ගොස් තැන්පත් වන අතර මෙම සිදුවීම කාලන්තරයක් තිස්සේ සිදුවීමේ ප්‍රතිපලයක් ලෙස සාගරයේ මණ්ඩි ලෙස පත්ලේ තැන්පත් වේ.මේ හේතුවෙන් C-12 සාගර පතුලට එක්වේ.නමුත් පැසිෆික් වෙරළ තීරයන් හා ගිනි වළල්ල සලකා බැලුවිට වෙරළට සැතපුම් කිහිපයක් ඈතින් පිහිටන ගිනිකඳු තුලින් Hornblende ස්ඵටික නිර්මාණයට ජලය තිබීම, ගිනිකඳු තුලින් පිටවූ වායූන්ගේ C-12 නිරීක්ෂණය වීම වැනි කරුණු ඈත සාගර පතුලේ තැන්පත් වූ දෑ සමඟ දක්වන සබැඳියාව විද්‍යාඥයින් පෙන්වා දෙන්නේ එක්තරා සුවිශේෂී භූ විද්‍යාත්මක සංසිද්ධියක් හරහා වීම සුවිශේෂී වේ.එනම් මෙය පහදා දිය හැක්කේ Subduction නම් භූ විද්‍යාත්මක ක්‍රියාවලිය මඟිනි.

Subduction ක්‍රියාවලිය

පෘථිවිය දෙස බැලූ බැල්මටම නොපෙනුනත් පෘථිවි ශිලා ගෝලය (Lithosphere) භූ තල ගණනාවකට වෙන්වී ඇත.පෘථිවි අභ්‍යන්තරයේ මැග්මා ක්‍රියාකාරීත්වය නිසා මෙම භූ තල නිරතුරු චලනය වේ. සාගරයක් සහිත කබොලක් ඇති භූ තලයක් සහ මහාද්වීපික කබොලක් සහිත භූ තලයක් ගැටුනු කල සාගර කබොල සහිත භූ තලයේ ශිලාගෝලය මහාද්වීපික කබොල සහිත භූ තලය පහළින් ඝර්ෂණයකට භාජනය කරමින් තෙරපී පෘථිවි මැන්ටලය (Mantle) තුලට  ගමන් කරයි.එසේ වන්නේ සාගර කබොල සහිත භූ තලය මහාද්වීපික කබොලක් සහිත භූ තලයට වඩා ඝනත්වයෙන් අඩු හෙයිනි.එනිසා මෙම Subduction ක්‍රියාවලිය සිදුවන භූ තල මායිම් ඔස්සේ  ඇතුලට නෙරුනු ස්වභාවයක් සහිතව විහිදුනු සාගර අගල් (Oceanic Trenches) නිර්මාණය වේ.

ඉහත ක්‍රියාවලිය පැසිෆික් භූ තලයටද පොදුය.පැසිෆික් භූ තලය ප්‍රධාන භූ තල අතුරින් විශාලතම භූ තලයද වේ.විශාල සාගර කලාපයක් සහිත කබොලකට හිමිකම් කියන පැසිෆික් භූ තලය ඊට තදාසන්න අනෙකුත් භූ තල හා ගැටීමේදී සිදුවන Subduction ක්‍රියාවලිය නිසා පැසිෆික් භූ තල මායිමේ කැපී පෙනෙන විශාල සාගර අගලක් නිර්මාණය වී තිබීම  විද්‍යාඥයින් විසින් රේඩාර් මඟින් නිරීක්ෂණය කොට ඇත.ඉහත Subduction ක්‍රියාවලිය නිසා සාගර කබොලේ ඉහල ස්ථර වල තැන්පත්ව තිබූ දෑ තෙරපී සීරී ගොස් අනෙක් භූ තලයේ මහාද්වීපික කබොලට එකතු වී උස් බිම් ,නව වෙරල සීමාවන් සහිත ගොඩබිම් නිර්මාණය කරයි.එසේම ක්‍රියාවලිය ඔස්සේ පහලට ගමන් කරන පෙර සාගර පතුලට වන්නට පිහිටා තිබූ ස්ථරවල තැන්පත්ව තිබූ ජලය හා Phytoplankton වැනි ක්ෂුද්‍ර ජීවීන් නිසා එකතු වූ C-12 වැනි දෑ පෘථිවි අභ්‍යන්තරයේ ඇති මැග්මා සමඟ කැකෑරී මහාද්වීපික කබොලේ නිර්මාණය වී ඇති ගිනි කඳු ඔස්සේ C-12 අඩංගු වායූන් සමඟ වාතලයට එක් වීම සහ ජලය නිසා භූ ඝර්භය තුල Hornblende ස්ඵටික නිර්මාණය වී එවා ගිනිකඳු විදාරණයේදී පිටතට පැමිණීම මඟින් විද්‍යාඥයින්ට ඉහත සාධක නිරීක්ෂණය කල හැකි වීම විස්තර කල හැක.

අලි - ඉනොකි සටන

අලි හා ඉනොකි තරගය අතරතුර

1975 වසරේදී හෙවිවේට් බර පන්ති බොක්සිං ශූරයෙක් වූ මොහොමඩ් අලි විසින් එක්තරා සාදයකදී ඇමෙරිකාවට පැමිණ  සිටි එවකට ජපන් ආධුනික මල්ලව පොර ක්‍රීඩා සංගමයේ සභාපතිවරයා ලෙස කටයුතු කල ඉචිරෝ යදා සමඟ අපූරු කතාබහක් ඇතිවිය. එහිදී අලි විසින් තමන්ට අභියෝගයක් කල හැකි පෙරදිග සටන් කරුවෙක් නොමැතිදැයි විමසා ඇති අතර එසේ සිටී නම් තමන් සමඟ තරග වැදී ඔහු ජයග්‍රහණය කලහොත් තමන් ඔහුට ඇමෙරිකානු ඩොලර් මිලියනයක් ලබා දෙන බවට යෝජනාවක් සිදුකර ඇත. අලි විසින් සිදුකල මෙම ප්‍රකාශය ඉචිරෝ විසින් ජපන් මාධ්‍යයට නිරාවරණය කිරීමත් සමඟ තත්වය වෙනස්ම මුහුණුවරක් ගැනිනි.මාධ්‍ය හරහා හෙළිදරව් වූ අලි ගේ මෙම අභියෝගයට ප්‍රතිචාර දකවන්නේ අන්තෝනියෝ ඉනොකි නම් ජපන් මල්ලව පොර ශූරයාය. තරගයට පෙරතුව ගණුදෙනුව සඳහා 1976 වසරේ මාර්තු මස අත්සන් කෙරීම සිදුවිය.තරගය පැවැත්වීමට පෙර සිටම දැඩි මාධ්‍ය අවධානයක් ලැබී තිබිනි.

සටන් කරුවන් දෙදෙනා සටන් ආකාර දෙකක් නියෝජනය කරන හෙයින් මෙම විශේෂිත තරගය සඳහා තරග නීතිරීති වෙනස් කිරීමට බලධාරීන්ට සිදුවුනි. තරගය පෙරතුව තිබූ මාධ්‍ය සාකච්ඡාවකදි අලි විසින් ඉනොකිට "පෙලිකන්" යැයි උපහාසාත්මක වාග් ප්‍රහාරයක් එල්ල කොට තිබිනි. ඊට හේතුව වූයේ ඉනොකිට දික්වූ පුළුල් නිකටක් පැවතීමයි . ඊට ප්‍රතිචාර වශයෙන් ඉනොකි "ඔහේගේ මුෂ්ටිය මුලින්ම මගේ නිකටේ වැදිලා තුවාල නොවෙන්න ප්‍රවේසම් කරගන්නවා" යනුවෙන් පවසා තිබේ. සටන 1976 වසරේ ජුනි 26 වැනි දින ජපානයේ Nippon Budokan ගෘහස්ථ ක්‍රීඩාංගණයේ පැවැත්විනි .ඉනොකි තරගය පුරා අලිගේ පාද ඉලක්ක කොට පහර දීම කැපී පෙනිනි.අලීට බොක්සිං තරගයක මෙන් වැරෙන් මුෂ්ටි ප්‍රහාර එල්ල කිරීමට ඇති හැකියාව මෙයින් සීමා වුනි.ඉනොකිගේ පා පහර වලින් ගැලවෙන අතරතුර මුළු තරගය පුරා අලිට එල්ල කිරීමට හැකිවූයේ මුෂ්ටි ප්‍රහාර හයක් පමණි.

අලි විසින් ඉනොකි 1998 වසරේ මුණගැසුනු අවස්ථාව

වට 15ක් පුරා ඇදී ගිය මෙම තරගය ජය පරාජයෙන් තොරව අවසන් විය.මෙම තරගයේදී අලි ගේ පාදවලට ඉනොකි විසින් එල්ල කල පහර දීම් කිහිපයක් නිසා අලි ගේ පාදවල ලේ ගැලීම් සිදුවී තිබුනි.තරගයේ නීතීරීති වෙනස් වීම නිසා සටනේ තරගකාරීත්වයට සිදුවූ බාධා නිසා තරගය ගැන ඊට පෙරසිට බලාපොරොත්තු වුනු අකාරයටම තරගය නැරඹීමට පැමිණි ප්‍රේක්ෂකයන් සතුටු වී නැහැ.ඇතැම් විචාරකයන් පවසන පරිදි මෙම තරගය මොහොමඩ් අලි ගේ බොක්සිං ක්‍රීඩා අනාගතයට බෙහෙවින් නරක බලපෑමක් සිදුකර තිබේ.කෙසේ හෝ මෙම තරගයෙන් අනතුරුව අන්තෝනියෝ ඉනොකි සහ මොහොමඩ් අලි ඉතා කුළුපග මිතුරන් බවට පත්විය.

ලූසොන් දූපතේ පුදුමාකාර පිහිටීම

දූපත් 3 සහ විල් 2 එකම ඡායාරූපයක

පිලිපීන දූපත් රාජ්‍යයේ විශාලතම සහ ජනාකීර්ණම දූපත වන්නේ වර්ග කිලෝමීටර 109,965 කින් සමන්විත ලූසොන් (Luzon) දූපතයි. පිලිපීනයේ අගනගරය වන මැනිලා නුවර පිහිටා ඇත්තේද එම දූපතේය. ලොව සිව්වැනි ජනාකීර්ණම දූපත වන්නේද ලූසොන් දිවයිනයි. මෙම දූව නැගෙනහිරෙන් පිලිපීන මුහුදෙන්ද, දකුණෙන් සිබුයාන් මුහුදෙන්ද, බටහිරෙන් දකුණු චීන මුහුදෙන්ද වටවී ඇති අතර උතුරෙන් ලූසොන් සමුද්‍ර සංධියෙන් තායිවානයෙන් වෙන්වේ. මෙම ලූසොන් දූපත තුල ස්වභාව ධර්මයේ අරුම පුදුම භූ විෂමතාවයක් පිහිටා ඇත.එනම් දූපත තුල විලක්, එම විල තුල දූපතක්, එම දූපත තුල විලක්, එම විල තුල දූපතක් ලෙසින් ඇති පිහිටීමකි.

සැටලයිට් ඡායාරූපයක්

ලූසොන් දූපතේ ටාල් නම් ගිනි කඳු සංකීර්ණයක් ඇත. එය ඉතිහාසය පුරා 33 වතාවක් විදාරණය වී ඇති අතර පිලිපීනයේ දෙවැනියට වඩාත්ම සක්‍රීය ගිනිකන්ද වේ. මීට වසර ලක්ෂයක් - ලක්ෂ පහක් අතර කාලයකට පෙර සිදුවූ ගිනිකඳු විදාරණයක ප්‍රතිපලයක් ලෙස  සෑදුනු අවාටයක් මිරිදිය ජලයෙන් පිරී ලූසොන් දූපත මැද ටාල් (Taal) නමින් අද හැඳින්වෙන විල බිහිවී තිබේ.එය පිලිපීනයේ තෙවැනි විශාලතම විලද වේ.එම විල තුල විලෙන් ඉහලට මතුවී පෙනෙන ගිනිකඳු විවරයකින් සමන්විත කොටස දූපතක් (Volcano Island) ලෙසින් ඇත.එම ගිනිකඳු විවරය තුල ජලය එක් රැස් වී විලක් නිර්මාණය වී ඇති අතර එම විල (Main Crater Lake) තුල ජලයෙන් ඉහලට මතුවී පෙනෙන දූපතක් (Vulcan Point Island) ඇත.

ගිනිකඳු විවරයෙහි ඇති විල සහ එහි ඇති කුඩා දූපතේ සමීප සැටලයිට් ඡායාරූපයක්